ليه صناع المسلسل اختاروا شخصية زي دي بالأخص علشان يجسدوها !
وإيه الحكاية بالظبط؟ بالصور الحقيقيه
ومين هو سفاح الجيزة الحقيقي؟!
فأنا جاي النهاردا أقول لك القصة كاملة، من أول جثة، للنهاية.
فلو مش عارف.
ركز معايا، وهتعرف.
جاهز؟
يلا بينا.
(قذافي فراج)،
شاب بسيط من سكان الجيزة، في 2015م كان بيملك مكتبة، وكان شغال فيها بنت اسمها (نادين)، وكان على علاقة غير شرعية معاها.
بيفضل (قذافي) على علاقة بالبنت فترة، وبعدين بيشوف أختها، فبتعجبه، وبيحاول يعمل معاها علاقة هي كمان، بس البنت بترفض.
(قذافي) مقبلش رفض البنت، وقرر إنه يطولها بأي تمن، فراح يخطبها، ولكن (نادين) أختها معجبهاش الوضع، فهددته وقالت له إنها هتفضحه
في شهر مارس 2015م (قذافي) استدرج (نادين) للشقة عنده علشان ينهوا مشاكلهم مع بعض، شقته في بولاق الدكرور دور أرضي، وأول ما دخلت وقعدت قدم لها كوباية عصير فيها سم، البنت بدأت تصارع الألم بعد ما السم دخل جسمها، راح ضاربها بآلة حادة على راسها كذا ضربة لحد ما ماتت، وحفر في الشقة ودفن جثتها وردم عليها وبلط الشقة تاني
وعلشان يبعد الشبهة عنه، مسك تليفونها وفبرك رسايل بينها وبين شاب، وبعتها لأهلها علشان يقنعهم إنها اتعرفت على شاب عايش بره وهربت معاه علشان تشتغل في التمثيل والسينما، وللأسف الأهل صدقوا
خليني أقول لك إن عقله حرفيًا شغال زي مكنة مبتقفش، واحد لسه مرتكب جريمة زي دي طبيعي عقله يقف، بس اللي حصل غريب.
(قذافي) بيكمل حياته طبيعي، بل إنه بيبدأ يتجه لفعل تاني أغزب.
(قذافي) كان على تواصل مع صديق طفولته مهندس اسمه (رضا) شغال في السعودية، فبدأ يقنعه إنه عاوز يستثمر فلوسه في مجموعة مشروعات هتحقق له أرباح يأمن بيها مستقبله، وفعلًا (رضا) اقتنع وعمل له توكيل، ولكن (قذافي) باع لنفسه كل ممتلكات (رضا)، وكان ناوي يسافر ويهرب، ولكن (رضا) كان مقرر إنه ياخد أجازة في مصر من غير زوجته وأطفاله، علشان يشوف المشاريع اللي بدأ يعملها صاحبه (قذافي).
وطبعًا كانت زيارة مفاجأة، (قذافي) لما شاف (رضا) قدامه معرفش يتصرف ازاي ويوريله المشاريع اللي هو أصلًا معملهاش، فعزمه في شقته علشان يتكلموا بخصوص المشاريع ويوريله المستندات والأوراق، وبعد ما وصل (رضا) شقة (قذافي)، وكانت شقة غير الأولى، جاب له كوباية عصير ووجبة فيهم سم، وبعد ما بدأ السم يدخل في جسم (رضا) عمل نفس اللي عمله مع (نادين) وضربه على دماغه كذا ضربة بآلة حادة، لحد ما مات.
(قذافي) خد جثة صديقه في شنطة سفر كبيرة، ونقلها لشقة بولاق الدكرور، وحفر حفرة مترين جنب مكان دفن (نادين)، ودفن الجثة وبلط المكان مرة تانية.
اختفاء رضا
بعد اختفاء (رضا) إخواته وأصدقائه فضلوا يبحثوا عنه ومعرفوش يوصلوا له، ولما طال البحث خاف (القذافي) لا الأهل يوصلوا له فبعت لهم رسالة من تليفون (رضا) وقال لهم إنه اتقبض عليه في مظاهرة وهو محبوس في مكان ومش عارف هو فين !
بدأوا يدوروا عليه في الأقسام والسجون ومكنوش عارفين يوصلوا لحاجة، وقدموا بلاغات اختفاء كتير باسم الضحية.
(قذافي) يسكت ؟
لا.
في حين إن الأهل بيبحثوا عن (رضا) صاحبه، (قذافي) قرر إنه يعمل حاجة تبين جبروته وإن تفكيره حرفيًا في حتة لوحده.
(قذافي) زور بطاقة وورق جديد باسم (رضا) صاحبه اللي أهله بيدوروا عليه، وانتحل شخصية صاحبه، وبدأ يتعامل مع الناس على إن هو (رضا)، علشان لو ارتكب جرايم تانية تكون باسم تاني.
في الوقت دا كان متزوج من واحدة اسمها (فاطمة)، مسلمتش منه هي كمان.
بعد 6 شهور من قتـل صاحبه، قتل مراته (فاطمة)، اللي هو حرفيًا حياته مبتعطلش، مليانة كوارث.
فيه سيناريوهات كتير حوالين الموضوع دا.
يُقال إنها اكتشفت إنه انتحل شخصية صاحبه وقتله، وإنه ارتكب جرايم تانية، فخاف إنها تفضحه فقتلها.
ويُقال إن الموضوع الحقيقي هو إنه كان مجندها لحسابه وبيخليها تجمع فلوس من جيرانها وتدهاله على أساس يستثمرها مقابل أرباح متفق عليها، وبعد فترة بدأ عدد من الجيران يطالبوا مراته بالفلوس، ولما طلبت من (قذافي) الفلوس أكتر من مرة قتلها بنفس الطريقة اللي قتل بيها (رضا) و(نادين)، وقال لأسرتها إنها سرقت منه فلوس وهربت علشان يبعد عنه الشبهات.
قرر يغير مكان معيشته، فقعد في شقة صاحبه (رضا) اللي نصب عليه وقتله وكمان انتحل شخصيته، الشقة كانت في بولاق، و(رضا) له أخت بتبحث عنه من وقت إختفاؤه، لدرجة إنها كانت بتروح الحوادث تشوف الجثث اللي هناك علشان تتعرف على أخوها، وفي مرة رجعت بولاق وعرفت إن (رضا) ليه صديق قاعد في شقته، ولما سألت أهلها قالوا لها إنه اشتراها من (رضا) قبل ما يختفي، وإنه قال لهم إن (رضا) اتقبض عليه في مظاهرة، ومن هنا بدأت العيون تيجي عليه لعلاقته بـ(رضا).
ولما حس إنه في خطر سافر إسكندرية وعاش باسم (رضا)، وفتح محل أدوات كهربائية هناك، وبعد شهور اتعرف على واحدة هناك وأقنعها إنه بيحبها وعاوز يتزوجها، وقدر يخليها تبيع شقة قديمة هناك ملكها وتديله 45 ألف جنيه، ولما حست إنه نصب عليها طلبت منه الفلوس، فقال لها إنه مش معاه فلوس ولو عوزاها تاخد بضاعة بتمنها.
ومش معروف كان بيودي الفلوس اللي بينصب بيها دي كلها فين!
الست بتوافق، وبيروحوا المخزن علشان تشوف البضاعة اللي هتاخدها، ولكن (قذافي) بيضربها على دماغها كذا ضربة وبيقتلها ويدفنها في المخزن.
خد نفسك معايا علشان المصايب اللي جاية لسه كتير ...
بعدها قرر إنه يتزوج من واحدة، وفعلًا تزوجها وخلف منها طفل، وفضلت حياته مستقرة لحد سنة 2019م.
حياته هادية وطبيعية، يستقر بقى؟
لا.
قرر يسرق شقة أبو مراته، وأخت مراته كانت منتقبة، فلبس نقاب وراح شقة أبو مراته علشان محدش يشك فيه، وقدر يدخلها، وسرق دهب وفلوس يقدروا بـ750 ألف جنيه.
الراجل عمل محضر، فرغوا الكاميرات وعرفوا إن فيه ست منتقبة دخلت العمارة وخرجت معاها شنطة، واتبعوا الكاميرات لحد ما وصلوا إن الست دي دخلت مكان تاني، وخرج مكانها (قذافي) ومعاه نفس الشنطة.
سنة 2020م قبضت الشرطة على (قذافي) واعترف إنه سرق، واتحكم عليه بسنة سجن باسم (رضا محمد عبد اللطيف)، وحاول يهرب في المحكمة ولكنه فشل، فحكموا عليه بـ3 شهور كمان لمحاولاته.
تيجي اصدمك؟
تعالى.
(قذافي) قبل ما يتسجن ولمدة 9 شهور كان متزوج من دكتورة صيدلانية اسمها (مي) من غير ما يقول لحد، وكان بيكلمها دايمًا إنه هيخرج لها قريب من السجن علشان يعيشوا مع بعض في هدوء وسعادة.
غالبًا كانت هتبقى الضحية اللي جاية.
في أواخر 2020م، عمليات البحث عن (رضا) و(قذافي) فضلت مستمرة، لحد ما لقوا محضر سرقة باسم (رضا محمد عبد اللطيف) في قسم سيدي جابر بالإسكندرية.
ومن هنا عرفوا يوصلوا للـ(قذافي) وهمَ فاكرينه (رضا)، ومع الضغط عليه وتهديده إنهم هيعملوا تحليل "DNA" ويكشفوا إنه مش (رضا)، اعترف إنه انتحل شخصيته وسرقه، وبعد ضغوطات اعترف إنه قتله، وبالضغط تاني اعترف إنه قتل (نادين) وزوجته (فاطمة)، واكتشفت الشرطة فيما بعد إنه قتل ست تانية في إسكندرية، اللي خلاها باعت شقتها وخد منها الـ45 ألف
استخراج الجثث
اتحركت الشرطة للشقة اللي في بولاق وخرجوا الجثث من الأرض.
خليني أقول لك إن لمدة كبيرة جدًا الشرطة فضلت تبحث عن إحتمالية إن (قذافي) يكون ارتكب جرايم تانية غير الجرايم دي، وإنه لسه معترفش ومتمش اكتشافها لحد دلوقتي.
يعني ممكن يكون قتل أكتر من كدا وسرق ونهب ناس كتير بس لسه مش معروف.
ولحد وقتنا هذا هو دا بس اللي معروف عنه، وما خفي كان أعظم.
الاحكام
سنة 2021م (القذافي) اتحكم عليه بـ4 أحكام بالإعدام في الـ4 جرايم القتل اللي ارتكبهم.
ولما دوروا وراه لقوه انتحل شخصيات كتير جدًا وزور بطايق كتير، فاتحكم عليه بالمؤبد في قضايا التزوير.
واتنفذ فيه حكم الإعدام.
بس يا سيدي، دي قصة سفاح الجيزة اللي قلبت الدنيا من سنتين ورجعت دلوقتي تاني تتفتح والناس كلها بتتكلم عنها.
القصة فعلًا مرعبة بطريقة غير طبيعية، ولو سألتني إيه الأكثر إرعابًا فيها بعد القتل والجرايم اللي ارتكبها.
هقول لك بكل أسف المرعب بجد هو إنه ازاي قدر يقنع كل الناس دي بحبه ليهم، واقتنعوا وسلموه كل ما يملكوا بالشكل دا.
صديق عمره اللي آمنة على ممتلكاته.
زوجته.
أي ست قرب منها ووهمها بالحب وصدقت.
ازاي كان قادر يعيش بالكذب والخداع دا.
ازاي كان عارف ينام وهو مرتكب كل جرايم القتل دي !
-